अंग देश रो हृदय छै चंपा,
अंगिका छै प्राण।
गंगा, कोशी, चंपा गावै,
हिनको कथा महान...
अंग देश रो हृदय छै चंपा,
अंगिका छै प्राण।
दैत्यराज बलि राजा रो,
जेठो बेटा अंग।
महादेव रो क्रोध सऽ,
ऐं ठऽ मदनो बनै अनंग।
श्रृंगी शांता रोमपाद रो महिमा अपरंपार,
पुत्रेष्ठि जग रो प्रभाव सऽ राम धरै अवतार।
दानवीर राधेय कर्ण पर चंपा करे गुमान......
गिरिवरनाथ शंखकूट पर जहनु अजगबधारी
विक्रमशिला तंत्र विद्या रो छै महिमा बलिहारी
सती बिहुला चांदो सौदागर अंग देश रो शान
रेशमनगरी नाम सऽ जग मऽ छै हिनको पहचान
बुद्ध विशाखा आरो मंजूषा, खूब बढ़ावै मान.......
अष्टावक्र कहोल दीपंकर छै हिनको संतान
मुगदल जहनु चंदनवाला कर्ण रो चंडी थान
तिलकामांझी मातृभूमि लऽ झूली गेलै फांसी
सरहदपाद कजंगला में ही अंगदेश रो वासी
राहुल सांस्कृत्ययान देलकै अंगिका कऽ नाम.......
मंदार मुकुटधारी ई भूमि,
छै गंगा हियहार
पुरबैया हलपै छै आरू पछिया बहै बयार
कतरनी रो खुशबू आरो छै जरदालू आम
जैन धर्म रो पंचकल्याणक,
चंपापुरी धाम।
वासुपुज्य महावीर सुधर्मा,
आलोक करै परनाम....🙏🏻
आलोक कुमार ✍🏻
कोई टिप्पणी नहीं:
एक टिप्पणी भेजें